أتقفل باب المناقصة
وحاشوف بعينى المآسى
وأكبت حماسى
وأقول كلام عاقل رزين
زى أبرد دبلوماسى
حاتابع الموقف بأعصاب الموظف
أنا ف قسم المرونة
والليونة
السخونة مش أختصاصى
رئيس مجلس إدارة المعركة طلب التعقل
مش حابقى عاصى
حاحط تلج ف قلب راسى
وحاحكم العقل جدا
وحاخلى قلبى المنفعل
من أهدا أنواع القلوب
بلاش حماس بالزياده
منعول أبوها الحروب
ف حدود بنود الموازنة
حانخش عصر الإباده
بصدر مفتوح وطوب
فيا أصدقائى الموافقين ع المهادنة
صوت الحجر
وصدور ولادنا
برنامج الحد الأدنى
صوت الحجر
أبلغ كتير من كل بيانات السياسة
صدر الولد
أصدق كتير من كل هتافات الحماسة
سكت الكلام
صوت الحجر
زى الوضوء
هو اللى ممكن عنا يزيل النجاسة
حايفضل الدم يجرى لحد
يوم النصره
حايفضل الدم فاير
ف الجليل والناصره
جيش العيال ف أبتدائى
شكل لجان المناصره
و نبقى شهدا
أو نبقى جرحى
أو نبقى أسرى
حانقول نصارى ومسلمين
وسبحان الذى أسرى
لما العيال يستشهدوا
زغرطى يا أمهاتنا
دم العيال هو تعويذة نجاتنا
جثث العيال دليل وجود
دليل وحيد على أننا
لازلنا نستاهل حياتنا
خلوا الجحر هو اللى يتفاوض
واحنا حانسمع كلمته
بس المهم ما نخرسوش ونكبته
دا الدم عنى غنوتة
وأنا شفت وسط المعمعه
عيل بيحفر سكته
شق الجموع الحاشده
وكان رزين فى خطوته
عيل صغير طول كدا
واقف طويل يا شمخته
لما المراسلين الأجانب قالهم
محمد الدره بقى رئيس جميع الموحدين
فى ساحة الأقصى
و محمد الدره قفل باب المناقصه
الأنتفاضة الطاهرة عادت
الشموع ف القدس قادت
كترت الجنازات وزادت
رقص العيال بالحجر ما زيه رقصه
خلوا الحجر هو اللى يتفاوض
وأحنا حانسمع كلمته
والحجر أبلغ كتير من بيانات السياسة
صدر الوليد أصدق كتير من هتافات الحماسه
سكت الكلام
سكت الهدوء
صوت الحجر
زى الوضوء
هو اللى ممكن عننا يزيل النجاسه
ليست هناك تعليقات:
إرسال تعليق