با لأسبرين ... والسكاكين
و بالمسدس مقتولين
على اعمدة كل الجرايد مصلوبين
شبان صغار
ازهار فى فجر العمر ما شافتش النهار
متكلبشين فى الزنازين او مغوزين
فى الطين فى قصر النيل وعايزين غطاسين
ع المشرحه انسان نحيف
بشنب خفيف اصفر لطيف
خدوده من قيمة يومين مش محلوقين
صوابعة من شرب السجاير محروقين
عينيه على جدار الفراغ متسمرين
وعلى الجبين رفرف سلام الميتين
ما تسألوش كان اسمه ايه
اسمه على المحضر بقى المجنى عليه
اسمه بقى الجثه فى اوراق الدوسيه
ما تسألوش عن قصته كان موته ليه
المسأله صبحت فى ايد المسؤلين
على ذمة التحقيق سجين
انسان حزين
فى قلبة احساس الغريق
مالهش عون
فى دماغه اكتر من حريق
لابس قميص مربعات وبنطلون
وف رجله صندل من زمان مالهش لون
يبص على اخر الطريق
يلاقيه ما بين رجليه تمام
ثابت عليه الاتهام
وحياته بين الناس حرام
حرام عليه يركب ترام
حرام عليه الاوتوبيس
حرام عليه الارصفه والفوانيس
والمدرسه والسينمات
مكتوب عليه يعيش ما بين المحابيس
فى اللومانات
ما تسألوش ده يبقى مين
شفتوه وبتشوفوه كتير فى الجرانين
بلاش سؤال
على كل حال
المسأله صبحت فى ايد المسؤلين
الشاعر صلاح جاهين
- ديوان ( كلمة سلام وموال عشان القنال )
ليست هناك تعليقات:
إرسال تعليق