قصيدة صاحب ندا


اصحى يا نايم 
وحد الدايم
وقول ناويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
مسحراتى صاحب ندا
منقراتى كدا كدا
فى ايدى طبله مجوده
امشى على ريحة الندى
والنسمه فى الجو منشده
توالى موالى والحدا
يامصر يا واحة مسعده
نطقت والفجر كان صدا
حتى الشجر فى الحجر شدا
لما بدات التاريخ بدا
لحمه وطول الزمان سدى
انتى الاميره المجاهده
الانسانية ام الفدا
ام الحضاره يا والده
ضميتى الازهر والسيده
والف مادنه يدا يدا
سياج لامه موحده
يا مصر عيشى على المدى
واهدينا ثانيه مخلده
اما الشهاده او الهدى
النصر الاكبر ع العدى
ياحكل عينى يا منجده
المشى طابلى
والدق على طابلى
ناس كانوا قابلى
قالوا فى المثال
الرجل تدب مطرح ما تحب
وانا صنعتى مسحراتى 
فى البلد جوال
حبيت ودبيت كما العشاق ليالى طوال
وكل شبر وحته من بلدى 
حته من كبدى
حته من موال
صوموا وقولوا امنا يا عباد الله
كونوا قلوب مطمئنه يا عباد الله
النصر فينا ومنا يا عباد الله
احنا عرب والنبى عربى وضامنا
مينكسرشى يميننا يا عباد الله
اصحى يا نايم 
وحد الدايم
السعى للصوم
خير من النوم
دى ليالى سمحه
نجومها سبحه
اصحى يا نايم 
يا نايم اصحى
وحد الرزاق

  • الشاعر / فؤاد حداد

قصيدة (الساعد إللي بني الأهرام )



يارب أنا اتوكلت عليك     ورجعت إليك
ما تنسانيش أنا صنع يديك     يا رؤوف يا ودود

مين كان يقول ان الأحزاب         تصبح أحباب
لك وحدك الحمد يا وهاب       يا صاحب الجود

جاعل خلايقك ناس بتحش       و ناس بتقش
و رحمتك من فوق بترش      الزرع ، تعود

تعود و بعد ما كان جلاوين     يرعاه خروفين
عيدان طويله و تملا العين     الله عالعود

كانت زريبه السنتين دول     يرعاها الصول
ويبص لك عمك جون بول      يلقاها اسود

شدوا اللبان بزياده كلام      و امشوا لقدام
الساعد اللي بني الاهرام    هواه موجود

يخلق بدال الانتيكه     ميت فابريكه
و يبيع لأمة امريكا     و بتوع فري جود

الدنيا كلها حسدانا       عـالـجـبـانـه
"وادي الملوك" أما نتانه       منك يا حسود

يعني المحبة لأمواتنا      و احنا حياتنا
و كلنا بجغرافيتنا      في الخارطه قرود

تزخرفونا بترتركم     و بأحمركم
و تشغلونا في دواركم    نلقط في الدود

و حق من انبته زينه      وفتله متينه
ليتنسج منه خاكينا       والباقى بارود

ويتقلب شعب الوادى     كله جهادى
مافيهش عاقل ولا هادى     غير الملحود

خيوب عليه إن ما جعلها      يمشى داخلها
م اسكندرية لتيلالها     فى عمار ممدود

والنيل يمين وشمال مجراه    يخلق سافواه
وصحرة الجيزه يا ولداه      تصبح هوليود

الشاعر الكبير ( بيرم التونسى )
Related Posts Plugin for WordPress, Blogger...